ਸਿੰਘ ਸਭਾ ਇੰਟਰਨੈਸ਼ਨਲ (ਕੈਨੇਡਾ) ਦੇ ਮੁੱਖੀ ‘ਜਿਊਣਵਾਲਾ ਤੇ ‘ਵਰਨਨ’ ਰੱਬੀ ਹੋਂਦ ਤੋਂ ਮੁਨਕਿਰ ਹਨ
੨੦ਵੀਂ ਸਦੀ ਦੇ ਮੁੱਢਲੇ ਦੌਰ ਵਿੱਚ ਸਿੰਘ ਸਭਾ ਲਹਿਰ ਦਾ ਜਨਮ ਹੋਇਆ ਸੀ ਰੱਬ ਨਾਲੋਂ ਟੁੱਟਿਆਂ ਨੂੰ ਗੁਰਬਾਣੀ ਦੁਆਰਾ ਮੁੜ ਰੱਬ ਨਾਲ ਜੋੜਣ ਲਈ । ਸਿੱਖ ਭਾਈਚਾਰੇ ਨੂੰ ਬਿਪਰਵਾਦੀ ਕਰਮਕਾਂਡਾਂ ਤੋਂ ਹਟਾਉਣ ਅਤੇ ਸਿੱਖੀ ਸਿਦਕ ਵਿੱਚ ਪ੍ਰਪੱਕ ਕਰਨ ਲਈ । ਪਰ, ਇੱਸ ਪੱਖੋਂ ਨਿਘਾਰ ਦਾ ਸਿਖਰ ਇਹ ਹੈ ਕਿ 'ਸਿੰਘ ਸਭਾ ਇੰਟਰਨੈਸ਼ਨਲ (ਕੈਨੇਡਾ)" ਦੇ ਆਪੂੰ ਮੁੱਖੀ ਬਣੇ ਗੁਰਚਰਨ ਸਿੰਘ 'ਜੀਊਣਵਾਲਾ' ਅਤੇ ਮਨਦੀਪ ਸਿੰਘ 'ਵਰਨਨ' ਹੁਣ ਰੱਬੀ ਹੋਂਦ ਤੋਂ ਹੀ ਮੁਨਕਿਰ ਹੋ ਗਏ ਹਨ । ਸਿੱਖ ਸੰਗਤਾਂ ਨੂੰ ਐਸੇ ਬਹੁਰੂਪੀਆਂ ਤੋਂ ਸੁਚੇਤ ਹੋਣ ਦੀ ਲੋੜ ਹੈ, ਜਿਹੜੇ ਸਿੰਘ ਸਭਾ ਦੇ ਨਾਂ ਦੀ ਦੁਰਵਰਤੋਂ ਕਰਕੇ ਸਿੱਖ ਜਗਤ ਨੂੰ ਗੁੰਮਰਾਹ ਕਰ ਰਹੇ ਹਨ ।ਮਨਘੜਤ ਦੂਸ਼ਣਬਾਜ਼ੀ ਕਰਨੀ ਅਤੇ ਅਪਸ਼ਬਦ ਬੋਲਣੇ ਤੇ ਲਿਖਣੇ ਸਿੱਖੀ ਸੁਭਾਵ ਦੇ ਅੰਗ ਨਹੀਂ ਹਨ । ਇਸ ਲਈ ਦਾਸ ਹਮੇਸ਼ਾ ਓਹੀ ਗੱਲ ਕਰਦਾ ਹੈ, ਜਿਸ ਦਾ ਮੇਰੇ ਪਾਸ ਪੱਕਾ ਸਬੂਤ ਹੋਵੇ । ਇਹ ਵੀ ਯਤਨ ਕਰਦਾ ਹਾਂ ਕਿ ਮੇਰੀ ਕੋਈ ਲਿਖਤ ਤੇ ਬਿਆਨਬਾਜ਼ੀ ਸਾਡੀਆਂ ਵਿਚਾਰਧਾਰਕ ਵਿੱਥਾਂ ਨੂੰ ਹੋਰ ਨਾ ਵਧਾਵੇ । ਕਿਉਂਕਿ, ਸਿੱਖ ਭਾਈਚਾਰੇ ਦੇ ਬੁੱਧੀਜੀਵੀ ਅਤੇ ਜਾਗਰੂਕ ਅਖਵਾਉਂਦੀਆਂ ਧਿਰਾਂ ਪਹਿਲਾਂ ਹੀ ਖਖੜੀਆਂ ਖਰਬੂਜੇ ਹੋਈਆਂ ਪਈਆਂ ਹਨ । ਕੁਝ ਦਿਹਾੜੇ ਪਹਿਲਾਂ ਦਾਸ ਨੇ ਇੱਕ ਲੇਖ ਲਿਖਿਆ ਸੀ 'ਗੁਰਮਤਿ ਪ੍ਰਚਾਰਕਾਂ ਦਾ ਰੱਬ ਅਤੇ ਗੁਰੂ ਦੀ ਨਿਵੇਕਲੀ ਹੋਂਦ ਤੋਂ ਮੁਨਕਿਰ ਹੋਣਾ ਸਿੱਖੀ ਲਈ ਘਾਤਕ'। ਕਿਉਂਕਿ, ਮੈਂ ਮਹਸੂਸ ਕੀਤਾ ਕਿ ਨਵੀਂ ਪੀੜ੍ਹੀ ਦੇ ਕੁਝ ਸਿੱਖ ਪ੍ਰਚਾਰਕ ਤੇ ਲੇਖਕ ਕਾਮਰੇਡੀ ਸੋਚ ਤੋਂ ਪ੍ਰਭਾਵਿਤ ਹੋ ਕੇ ਉਪਰੋਕਤ ਕਿਸਮ ਦੀ ਬਿਆਨਬਾਜ਼ੀ ਕਰ ਰਹੇ ਹਨ । ਮੇਰਾ ਮਕਸਦ ਕੇਵਲ ਇਹੀ ਸੀ ਕਿ ਉਹ ਸੱਜਣ ਇਸ ਪੱਖੋਂ ਸੰਭਲਣ ਤੇ ਗੁਰਮਤਿ ਦੇ ਗਾਡੀ ਰਾਹ ਤੋਂ ਨਾ ਭਟਕਣ । ਅਸਲ ਵਿੱਚ ਇਹੀ ਕਾਰਨ ਹੈ ਕਿ ਸਾਹਿਬਜ਼ਾਦਾ ਜੁਝਾਰ ਸਿੰਘ ਮਿਸ਼ਨਰੀ ਕਾਲਜ ਰੋਪੜ ਨੇ ਆਪਣੇ ਮਾਸਿਕ ਪੱਤਰ 'ਮਿਸ਼ਨਰੀ ਸੇਧਾਂ ਅਪ੍ਰੈਲ ੨੦੧੪ ਵਿੱਚ ਵਿਸ਼ੇਸ਼ ਤੌਰ 'ਤੇ ਛਾਪਿਆ ਅਤੇ ਹਜ਼ਾਰਾਂ ਦੀ ਗਿਣਤੀ ਵਿੱਚ ਵੱਖਰਾ ਛਾਪ ਕੇ ਵੰਡਿਆ ।
ਗੁਰਮਤਿ ਗਿਆਨ ਮਿਸ਼ਨਰੀ ਕਾਲਜ ਦੇ ਨੌਜਵਾਨ ਪ੍ਰਸਿੱਧ ਪ੍ਰਚਾਰਕ ਪ੍ਰੋ. ਸਰਬਜੀਤ ਸਿੰਘ ਧੂੰਦਾ ਤੇ ਪ੍ਰੋ. ਹਰਜਿੰਦਰ ਸਿੰਘ ਸਭਰਾ ਨੇ ਕਾਲਜ ਦੇ ਸਲਾਨਾ ਸਮਾਗਮ ਵੇਲੇ ੨੫ ਮਈ ਨੂੰ ਉਪਰੋਕਤ ਲੇਖ ਦੀ ਸ਼ਲਾਘਾ ਕੀਤੀ ਤੇ ਇਸ ਨੂੰ ਸਮੇਂ ਦੀ ਲੋੜ ਦੱਸ ਕੇ ਧੰਨਵਾਦ ਕੀਤਾ ।
ਸਿੱਖੀ ਦੇ ਹਮਦਰਦ ਕੁਝ ਪਤਰਕਾਰ ਸੱਜਣਾ ਨੇ ਈ-ਮੇਲ ਪੱਤਰਾਂ ਤੇ ਫੋਨ ਸੰਪਰਕ ਰਾਹੀਂ ਜ਼ੋਰ ਦਿੱਤਾ ਕਿ ਸਾਨੂੰ ਐਸੇ ਲੋਕਾਂ ਦੇ ਨਾਂ ਦੱਸ ਦਿਓ, ਤਾਂ ਕਿ ਅਸੀਂ ਭਵਿੱਖ ਵਿੱਚ ਸੁਚੇਤ ਰਹੀਏ । ਉਨ੍ਹਾਂ ਇਹ ਵਾਅਦੇ ਵੀ ਕੀਤੇ ਕਿ ਅਸੀਂ ਆਪਣੀ ਵੈਬਸਾਈਟ ਜਾਂ ਅਖ਼ਬਾਰ ਵਿੱਚ ਐਸੇ ਨਾਂ ਨਸ਼ਰ ਨਹੀਂ ਕਰਾਂਗੇ । ਪ੍ਰੰਤੂ, ਦਾਸ ਆਪਣੇ ਇਸ ਕਿਸਮ ਦੇ ਸਾਰੇ ਸੱਜਣਾਂ ਨੂੰ ਇਹ ਕਹਿ ਕੇ ਟਾਲਦਾ ਰਿਹਾ ਕਿ ਸਬਰ ਰੱਖੋ ਤੇ ਉਡੀਕ ਕਰੋ, ਜਿਨ੍ਹਾਂ ਨੂੰ ਪੀੜ ਹੋਏਗੀ ਉਹ ਆਪ ਹੀ ਬੋਲ ਪੈਣਗੇ । ਕਿਉਂਕਿ, ਰੱਬ ਨਾਲੋਂ ਟੱਟੇ ਲੋਕ ਫੋਕੀ ਹਉਮੈ ਦਾ ਸ਼ਿਕਾਰ ਹੋਣ ਕਰਕੇ ਸਹਨਸ਼ੀਲਤਾ ਤੇ ਧੀਰਜ ਤੋਂ ਸੱਖਣੇ ਹੁੰਦੇ ਹਨ ।ਇਸ ਪੱਖੋਂ ਸਭ ਤੋਂ ਪਹਿਲਾਂ ਬੋਲਵਿਗਾੜ ਬਣਿਆਂ ਕੋਈ ਮਨਦੀਪ ਸਿੰਘ 'ਵਰਨਨ', ਜਿਸ ਨੇ 'ਸਿੱਖ ਮਾਰਗ' ਵੈਬਸਾਈਟ ਰਾਹੀਂ ਤਿੰਨ ਪੱਤਰ ਲਿਖ ਕੇ ਟੇਢੇ ਢੰਗ ਨਾਲ ਆਪਣੇ ਦਿਲ ਦੀ ਭੜਾਸ ਕੱਢੀ । ਪਤਾ ਚੱਲਿਆ ਕਿ ਇਹ ਸੱਜਣ 'ਸਿੰਘ ਸਭਾ ਇੰਟਰਨੈਸ਼ਨਲ (ਕੈਨੇਡਾ)' ਦੇ ਮੁੱਖੀ ਭਾਈ ਗੁਰਚਰਨ ਸਿੰਘ 'ਜੀਊਣਵਾਲਾ' ਦੀ ਸੱਜੀ ਬਾਂਹ ਹੈ । ਬਹੁਤ ਹੈਰਾਨੀ ਹੋਈ । ਯਕੀਨ ਵੀ ਨਹੀਂ ਸੀ ਆ ਰਿਹਾ । ਕਿਉਂਕਿ, ਲੇਖ ਦਾ ਤਾਂ ਵਿਰੋਧ ਓਹੀ ਸ਼ਖਸ ਕਰ ਸਕਦਾ ਹੈ ਜਿਹੜਾ ਰੱਬ ਤੇ ਗੁਰੂ ਦੀ ਨਿਵੇਕਲੀ ਹੋਂਦ ਤੋਂ ਮੁਨਕਿਰ ਹੋਵੇ । ਇਤਨੇ ਨੂੰ ਜੀਊਣਵਾਲੇ ਨੇ ਜ਼ਹਿਰ ਉਗਲਿਆ ਫੋਨ ਕਰਕੇ ਮੇਰੇ ਮਿਤਰ ਭਾਈ ਦਲਜੀਤ ਸਿੰਘ ਨਿਓਡਾ ਪਾਸ । ਫਿਰ ਇਸ ਨੇ ਫੋਨ ਕਰਕੇ ਮੈਨੂੰ ਹਦਾਇਤ ਦਿੱਤੀ ਕਿ ਮੈਂ ਉਪਰੋਕਤ ਲੇਖ ਲਿਖਣ ਵਰਗੀਆਂ ਗੱਲਾਂ ਨਾ ਕਰਾਂ । ਪਰ ਮੈਂ ਪੰਡੋਰੀ ਸਿਧਵਾਂ (ਅੰਮ੍ਰਿਤਸਰ) ਵਿਖੇ ਸਮਾਗਮ ਵਿੱਚ ਹੋਣ ਕਰਕੇ ਜਵਾਬ ਵਿੱਚ ਬਹੁਤੀ ਗੱਲਬਾਤ ਨਾ ਕਰ ਸਕਿਆ । ਇਸ ਲਈ ਖ਼ਿਮਾਂ ਮੰਗ ਕੇ ਇਤਨਾ ਹੀ ਉੱਤਰ ਦਿੱਤਾ ਕਿ 'ਵਰਨਨ' ਨੇ ਆਪਣੇ ਪੱਤਰਾਂ ਵਿੱਚ ਭਾਸ਼ਾ ਅੱਛੀ ਨਹੀਂ ਵਰਤੀ । ਮੈਂ ਛੇਤੀ ਹੀ ਨਿਊਯਾਰਕ ਆ ਰਿਹਾਂ । ਉਥੇ ਪਹੁੰਚ ਕੇ ਵਿਸਥਾਰ ਪੂਰਵਕ ਬਾਕੀ ਗੱਲ ਕਰਾਂਗਾ ।
੫ ਅਪ੍ਰੈਲ ਨੂੰ ਜੀਊਣਵਾਲੇ ਦਾ ਈ-ਮੇਲ ਪੱਤਰ ਮਿਲ ਗਿਆ । ਇਸ ਵਿੱਚ ਲੰਬਾ ਚੌੜਾ ਬਕਵਾਸ ਕਰਨ ਤੋਂ ਪਿਛੋਂ ਹੇਠ ਲਿਖੇ ਲਫ਼ਜ਼ਾਂ ਦੁਆਰਾ ਆਪਣੇ ਸਾਥੀ 'ਵਰਨਨ' ਬਾਰੇ ਪ੍ਰਗਟਾਏ ਮੇਰੇ ਰੋਸ ਦਾ ਜਵਾਬ ਦਿੰਦਿਆਂ ਉਸ ਨੇ ਹੇਠ ਲਿਖੇ ਲਫ਼ਜ਼ਾਂ ਵਿੱਚ ਰੱਬ ਬਾਰੇ ਬਹਿਸ ਕਰਨ ਦੀ ਇਉਂ ਚਣੌਤੀ ਦੇ ਮਾਰੀ : “ਜੇ ਤੁਸੀਂ ਨਾ ਲਿਖਦੇ ਤਾਂ ਮਨਦੀਪ ਸਿੰਘ ਵਰਨਨ ਨੇ ਤੁਹਾਨੂੰ ਸਵਾਲ ਨਹੀਂ ਸੀ ਪਾਉਣੇ। ਛਿੰਗ ਤੁਸੀਂ ਛੇੜੋ ਤੇ ਬਾਅਦ ਵਿਚ ਇਹ ਕਹੋ ਕਿ ਮਨਦੀਪ ਸਿੰਘ ਨੂੰ ਬੋਲੀ ਚੰਗੀ ਵਰਤਣੀ ਚਾਹੀਦੀ ਸੀ। ਗਿਆਨੀ ਜੀ ਇਹ ਕਿਹੜੇ ਕਾਇਦੇ ਵਿਚ ਲਿਖਿਆ ਹੈ। ਗਿਆਨੀ ਜੀ ਜੇ ਤੁਹਾਨੂੰ ਰੱਬ ਬਾਰੇ ਜ਼ਿਆਦਾ ਪਤਾ ਹੈ ਤਾਂ ਆਪਾਂ ਲੋਕਾਂ ਦੀ ਕਚਿਹਰੀ ਵਿਚ ਆਹਮਣੇ ਸਾਹਮਣੇ ਬੈਠ ਕੇ ਗੱਲ ਕਰ ਲੈਂਦੇ ਹਾਂ ? ”
ਸਪਸ਼ਟ ਹੈ ਕਿ ਸਿੰਘ ਸਭਾ ਇੰਟਰਨੈਸ਼ਨਲ ਆਤਮਿਕ ਮੌਤੇ ਮਰ ਚੁੱਕੀ ਹੈ । ਕਿਉਂਕਿ, ਸਿੱਖੀ ਸਰੂਪ ਵਿੱਚ ਰੱਬ ਅਤੇ ਗੁਰੂ ਦੀ ਨਿਵੇਕਲੀ ਹੋਂਦ ਤੋਂ ਮੁਨਕਿਰ ਹੋ ਰਹੀ ਸਾਕਤ ਜੁੰਡਲੀ ਦੇ ਕਮਾਂਡਰ ਬਣ ਗਏ ਹਨ 'ਜੀਊਣਵਾਲਾ' ਤੇ 'ਵਰਨਨ' । ਸ਼ੁਕਰ ਹੈ ਕਿ ਇਨ੍ਹਾਂ ਦਾ ਗੁੰਮਰਾਹਕੁਨ ਸਿੰਘ ਸਭੀਆ ਮੌਖਟਾ ਛੇਤੀ ਹੀ ਉੱਤਰ ਗਿਆ ਹੈ, ਜਿਸ ਕਰਕੇ ਮੇਰੇ ਵਰਗੇ ਕਈ ਲੋਕ ਹੁਣ ਤੱਕ ਇਨ੍ਹਾਂ ਦੇ ਪ੍ਰਸੰਸਕ ਬਣੇ ਰਹੇ । ਤਖ਼ਲਸ ਤਾਂ ਭਾਵੇਂ ਇਸ ਨੇ 'ਜੀਊਣਵਾਲਾ' ਰੱਖਿਆ ਹੈ, ਪਰ ਗਲਬਾਤ ਸੁਣ ਕੇ ਤੇ ਲਿਖਤ ਪੜ੍ਹ ਕੇ ਹਰੇਕ ਸੂਝਵਾਨ ਸੱਜਣ ਇਹੀ ਕਹਿੰਦੇ ਆ ਰਹੇ ਸਨ 'ਮੁਰਦਾ ਬੋਲੇ, ਕਫ਼ਨ ਪਾੜੇ'। ਪ੍ਰਸੰਸਾ ਦਾ ਕਾਰਨ ਸੀ ਇਨ੍ਹਾਂ ਵੱਲੋਂ ਗੁਰਮਤਿ ਗਿਆਨ ਮਿਸ਼ਨਰੀ ਕਾਲਜ ਲੁਧਿਆਣਾ ਦੁਆਰਾ ਚਲਾਏ ਜਾ ਰਹੇ ਪੰਜਾਬ ਵਿੱਚਲੇ 'ਗੁਰਮਤਿ ਪ੍ਰਚਾਰ ਸੈਂਟਰ' । ਪਰ, ਹੁਣ ਤਾਂ ਕੋਈ ਭੁਲੇਖਾ ਨਹੀਂ ਰਿਹਾ ਕਿ ਰੱਬੀ ਹੋਂਦ ਤੋਂ ਮੁਨਕਿਰ ਜਿਹੜੇ ਕਾਮਰੇਡ 'ਗੁਰਾਂ ਦਾ ਨਾਂ 'ਤੇ ਵੱਸਦੇ ਪੰਜਾਬ' ਵਿੱਚ ਫੇਲ ਹੋ ਗਏ ਸਨ । ਉਹ ਹੁਣ ਸਿੰਘ ਸਭਾ ਦੇ ਨਾਂ ਦੇ ਮੌਖਟੇ ਰਾਹੀਂ ਗੁਰਮਤਿ ਪ੍ਰਚਾਰਕ ਸੰਸਥਾਵਾਂ ਵਿੱਚ ਪ੍ਰਵੇਸ਼ ਕਰਕੇ ਗੁਰਦੁਆਰਿਆਂ ਦੇ ਪ੍ਰਬੰਧਕਾਂ, ਗੁਰਮੱਤੀ ਲੇਖਕਾਂ ਤੇ ਪ੍ਰਚਾਰਕਾਂ ਨੂੰ ਆਪਣੀ ਸਾਜਿਸ਼ ਦਾ ਸ਼ਿਕਾਰ ਬਨਾਉਣ ਲਈ ਯਤਨਸ਼ੀਲ ਹਨ । ਇਸ ਪੱਖੋਂ ਸਮੁੱਚੇ ਸਿੱਖ ਜਗਤ ਨੂੰ ਸੁਚੇਤ ਹੋਣ ਦੀ ਲੋੜ ਹੈ ।
ਜਿਥੋਂ ਤੱਕ ਸਵਾਲ ਹੈ ਜੀਊਣਵਾਲੇ ਦੀ ਚਣੌਤੀ ਦਾ । ਉਸ ਨੂੰ 'ਜਾਚਕ' ਆਪਣੇ ਸਤਿਗੁਰੂ ਦੇ ਭਰੋਸੇ ਪਰਵਾਨ ਕਰਦਾ ਹੋਇਆ ਸਾਕਤ ਜੁੰਡਲੀ ਨੂੰ ਸਪਸ਼ਟ ਕਰ ਦੇਣਾ ਚਹੁੰਦਾ ਹੈ ਕਿ ਦਾਸ ਤਾਂ ਕੀ ? ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਹਰੇਕ ਸੇਵਕ ਸਿੱਖ ਤੁਹਾਡੀ ਇਸ ਨਾਪਾਕ ਸਾਜਿਸ਼ ਦਾ ਭਾਂਡਾ ਲੋਕ ਕਚਿਹਰੀ ਦੇ ਚੌਰਾਹੇ ਵਿੱਚ ਭੰਨਣ ਲਈ ਤਿਆਰ ਹੈ । ਪਰ, ਸਾਡੀ ਸ਼ਰਤ ਇੱਕੋ ਹੋਏਗੀ ਕਿ ਵਿਚਾਰ-ਚਰਚਾ ਦੀ ਹਰੇਕ ਗੱਲ ਲਈ ਗੁਰਬਾਣੀ ਦਾ ਢੁੱਕਵਾਂ ਪ੍ਰਮਾਣ ਦਿੱਤਾ ਜਾਵੇ । ਕਿਉਂਕਿ, ਸਾਡੇ ਰੱਬੀ ਵਿਸ਼ਵਾਸ਼ ਦਾ ਆਧਾਰ ਹਨ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਮਹਾਰਾਜ । ਕੋਈ ਵੀ ਮਨਘੜਤ ਤੇ ਕਾਮਰੇਡਾਂ ਵਾਲੀ ਤਰਕਸ਼ਾਲੀ ਦਲੀਲ ਪ੍ਰਵਾਨ ਨਹੀਂ ਹੋਏਗੀ । ਤੁਸੀਂ ਰੱਬ ਨੂੰ ਮੰਨੋ ਭਾਵੇਂ ਨਾ, ਤੁਹਾਡੀ ਸੋਚ ਤਹਾਨੂੰ ਮੁਬਾਰਕ । ਪਰ, ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਮਹਾਰਾਜ ਦਾ ਐਲਾਨ ਹੈ :
ਹੈ ਤਉ ਸਹੀ, ਲਖੈ ਜਉ ਕੋਈ ॥ ਤਬ ਓਹੀ ਉਹੁ, ਏਹੁ ਨ ਹੋਈ ॥੪੨॥ ਸ੍ਰੀ ਗੁਰੂ ਗ੍ਰੰਥ ਸਾਹਿਬ - ਅੰਕ ੩੪੨
ਇਸ ਲਈ ਲੋਕ ਕਚਿਹਰੀ ਵਿੱਚ ਗੱਲਬਾਤ ਦੀ ਗੱਲ ਤਾਂ ਦੂਰ, ਤੁਸੀਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਮਹਾਰਾਜ ਵਿਚੋਂ ਕੋਈ ਇੱਕ ਵੀ ਸ਼ਬਦ, ਜਿਸ ਵਿੱਚ ਰੱਬੀ ਹੋਂਦ ਨੂੰ ਪ੍ਰਵਾਨ ਨਾ ਕੀਤਾ ਹੋਵੇ, ਪੱਤਰ ਦੇ ਜਵਾਬ ਵਿੱਚ ਲਿਖ ਭੇਜੋ ਤਾਂ ਮੈਂ ਆਪਣੀ ਹਾਰ ਮੰਨ ਕੇ ਤੁਹਾਡੇ ਨਾਲ ਸਹਿਮਤ ਹੋ ਜਾਵਾਂਗਾ । ਪਰ, ਜੇਕਰ ਤੁਸੀਂ ਅਜਿਹਾ ਉੱਤਰ ਨਾ ਦੇ ਸਕੋ ਤਾਂ ਫਿਰ 'ਸਿੱੰਘ ਸਭਾ' ਦਾ ਮੌਖਟਾ ਉਤਾਰ ਕੇ ਕਾਮਰੇਡਾਂ ਦੀ ਤਰਕਸ਼ੀਲ ਸੰਸਥਾ ਦੇ ਮੈਂਬਰ ਹੋਣ ਦਾ ਐਲਾਨ ਕਰ ਦਿਓ । ਸਾਡੀ ਹੋਰ ਕੋਈ ਮੰਗ ਨਹੀਂ ਹੈ ; ਕਿਉਂਕਿ, ਸਿੰਘ ਸਭਾ ਇੰਟਰਨੈਸ਼ਨਲ ਨਾਂ ਰੱਖ ਕੇ ਤੁਸੀਂ ਸਿੱਖ ਜਗਤ ਨੂੰ ਗੁੰਮਰਾਹ ਕਰਨ ਦਾ ਧ੍ਰੋਹ ਕਮਾ ਰਹੇ ਹੋ । ਯਾਦ ਰੱਖੋ, ਹੁਣ ਸਿੰਘ ਸਭਾ ਲਹਿਰ ਦੇ ਬਾਨੀ ਤੇ ਗਿਆਨ ਖੜਗ ਦੇ ਧਾਰਨੀ ਸੂਰਮੇਂ ਗਿਆਨੀ ਦਿੱਤ ਸਿੰਘ ਅਤੇ ਪ੍ਰੋ. ਗੁਰਮੁਖ ਸਿੰਘ ਦੀ ਪਵਿਤਰ ਗੁਰਮੁਖੀ ਸੋਚ ਤੇ ਸਕੰਲਪ ਨੂੰ ਤੁਹਾਡੇ ਵਰਗੇ ਬਹੁਰੂਪੀਆਂ ਦੁਆਰਾ ਪਲੀਤ ਨਹੀਂ ਕਰਨ ਦਿੱਤਾ ਜਾਏਗਾ । ਕਿਉਂਕਿ ਤੁਹਾਡੇ ਢੋਲ ਦਾ ਪੋਲ ਖੁੱਲ ਚੁੱਕਾ ਹੈ । ਗੁਰਵਾਕ ਹੈ :
ਉਘਰਿ ਗਇਆ ਜੈਸਾ ਖੋਟਾ ਢਬੂਆ, ਨਦਰਿ ਸਰਾਫਾ ਆਇਆ ॥
ਅੰਤਰਜਾਮੀ ਸਭੁ ਕਿਛੁ ਜਾਨੈ, ਉਸ ਤੇ ਕਹਾ ਛਪਾਇਆ ॥੩॥-ਗੁਰੂ ਗ੍ਰੰਥ ਸਾਹਿਬ - ਅੰਕ ੩੮੧
ਗੁਰੂ ਪੰਥ ਦਾ ਦਾਸ :
ਜਗਤਾਰ ਸਿੰਘ ਜਾਚਕ, ਲੁਧਿਆਣਾ ।
ਫੋਨ ੯੮੫੫੨੦੫੦੮੯
ਮਿਤੀ ੯ ਅਪ੍ਰੈਲ ੨੦੧੪