ਬਾਦਲ ਦੇ ਪਾਪਾਂ ਦਾ ਘੜਾ ਭਰ ਚੁੱਕਾ ਹੈ
     ਗੁਰਬਾਣੀ ਫੁਰਮਾਨ ਹੈ ,
                      ਇਸੁ ਜਰ ਕਾਰਣਿ ਘਣੀ ਵਿਗੁਤੀ ਇਨਿ ਜਰ ਘਣੀ ਖੁਆਈ ॥
                      ਪਾਪਾ ਬਾਝਹੁ ਹੋਵੈ ਨਾਹੀ ਮੁਇਆ ਸਾਥਿ ਨ ਜਾਈ ॥
                      ਜਿਸ ਨੋ ਆਪਿ ਖੁਆਏ ਕਰਤਾ ਖੁਸਿ ਲਏ ਚੰਗਿਆਈ ॥3॥        (417)
     ਇਸ ਧਨ ਨੇ ਬਹੁਤ ਦੁਨੀਆ ਨੂੰ ਖੁਆਰ ਕੀਤਾ ਹੈ , ਇਸ ਧਨ ਦੀ ਪਰਾਪਤੀ ਲਈ ਬਹੁਤ ਲੋਕਾਈ ਖੁਆਰ ਹੁੰਦੀ ਪਈ ਹੈ । ਪਾਪ , ਜ਼ੁਲਮ ਕਰਨ ਤੋਂ ਬਗੈਰ ਇਹ ਮਾਇਆ ਇਕੱਠੀ ਨਹੀਂ ਹੋ ਸਕਦੀ , ਤੇ ਮਰਨ ਵੇਲੇ ਇਹ ਇਕੱਠੀ ਕਰਨ ਵਾਲੇ ਦੇ ਨਾਲ ਨਹੀਂ ਜਾਂਦੀ । ਪਰ ਜੀਵ ਦੇ ਵੀ ਕੀ ਵੱਸ ਦੀ ਗੱਲ ਹੈ ? ਪਰਮਾਤਮਾ ਨੇ ਜਿਸ ਨੂੰ ਆਪ ਖੁਆਰ ਕਰਨਾ ਹੁੰਦਾ ਹੈ , ਉਸ ਕੋਲੋਂ ਉਸ ਦੀ ਚੰਂਗਿਆਈ ਖੋਹ ਲੈਂਦਾ ਹੈ ।
ਅੱਜ-ਕਲ ਪੰਜਾਬ ਵਿਚ, ਅਜਿਹੀਆਂ ਨਸਲਾਂ ਤਾਂ ਬਹੁਤ ਹਨ, ਜੋ ਦਾਅ ਲੱਗਣ ਤੇ ਪੰਜਾਬ ਨੂੰ ਸਮੂਲਚਾ ਨਿਗਲ ਜਾਣ, ਪਰ ਦੋ ਨਸਲਾਂ ਦੀ ਗੱਲ ਕਰਨੀ ਜ਼ਰੂਰੀ ਹੈ। ਇਕ ਹੈ ਅਮਰਿੰਦਰ ਸਿੰਘ ਦੀ ਤੇ ਦੂਸਰੀ ਹੈ. ਪਰਕਾਸ਼ ਸਿੰਘ ਬਾਦਲ ਦੀ। ਅਮਰਿੰਦਰ ਸਿੰਘ ਦੇ ਵਡੇਰੇ ਤਾਂ ਸੱਤ ਪੁਸ਼ਤਾਂ ਤੋਂ ਪੰਜਾਬ ਅਤੇ ਪੰਜਾਬੀਆਂ ਨੂੰ ਲੁੱਟ ਰਹੇ ਹਨ।ਪਰ ਪਰਕਾਸ਼ ਸਿੰਘ ਬਾਦਲ ਦੇ ਵਡੇਰੇ ਕੁਝ ਸਮਾ ਮਗਰੋਂ ਸ਼ੁਰੂ ਹੋਏ, ਸ਼ਾਇਦ ਏਸੇ ਕਰ ਕੇ ਬਾਦਲ ਸਾਹਿਬ ਅਮਰਿੰਦਰ ਸਿੰਘ ਦੀ ਬਰਾਬਰੀ ਕਰਨ ਲਈ ਤੇਜ਼ੀ ਨਾਲ ਚੱਲ ਰਹੇ ਹਨ ?
     ਕੁਝ ਅਜਿਹੀ ਹੀ ਦਸ਼ਾ ਅੱਜ ਕਲ ਪ੍ਰਕਾਸ਼ ਸਿੰਘ ਬਾਦਲ ਦੀ ਹੈ । ਉਸ ਨੇ ਪੈਸਾ ਇਕੱਠਾ ਕਰਨ ਲਈ , ਕਿਸੇ ਨੂੰ ਨਹੀਂ ਬਖਸ਼ਿਆ , ਅਪਣੇ ਇਸ਼ਟ , ਗੁਰੂ ਗ੍ਰੰਥ ਸਾਹਿਬ ਨੂੰ ਵੀ ਨਹੀਂ । ਅਪਣੇ ਭਾਈ ਚਾਰੇ , ਪੰਥ ਨੂੰ ਵੀ ਨਹੀਂ । ਅਪਣੀ ਮਾਂ ਬੋਲੀ ਪੰਜਾਬੀ ਨੂੰ ਵੀ ਨਹੀਂ । ਅਪਣੀ ਮਾਂ ਸਮਾਨ ਧਰਤੀ ਪੰਜਾਬ , ਉਸ ਦੇ ਪਾਣੀ ਨੂੰ ਵੀ ਨਹੀਂ । ਦਰਬਾਰ ਸਾਹਿਬ ਦੀ ਗੋਲਕ ਅਤੇ ਗੁਰਦਵਾਰਿਆਂ ਦੀਆਂ ਜ਼ਮੀਨਾਂ ਨੂੰ ਵੀ ਨਹੀਂ । ਅਪਣੀ ਪਾਰਟੀ ਵਿਚਲੇ ਸਹਿਯੋਗੀਆਂ ਨੂੰ ਵੀ ਨਹੀਂ । ਹੋਰ ਤਾਂ ਹੋਰ ਅਪਣੇ ਇਕਲੋਤੇ ਪੁਤ੍ਰ ਨੂੰ ਵੀ ਨਹੀਂ , ਉਸ ਦੇ ਖਾਣ ਲਈ ਉਸ ਚੀਜ਼ ਦਾ ਪ੍ਰਬੰਧ ਕੀਤਾ ਹੈ , ਜਿਸ ਨੂੰ ਖਾਣਾ , ਗੁਰਬਾਣੀ ਮੁਤਾਬਕ ਹਿੰਦੂਆਂ ਲਈ ਗਊ ਖਾਣ ਬਰਾਬਰ ਹੈ , ਅਤੇ ਮੁਸਲਮਾਨਾਂ ਲਈ ਸੂਅਰ ਖਾਣ ਬਰਾਬਰ ਹੈ ।
       ਸਾਰੇ ਬੰਨੇ ਹੱਥ ਮਾਰ ਲੈਣ ਮਗਰੋਂ , ਹੁਣ ਉਸ ਦਾ ਅੰਦਰ ਕੰਬ ਰਿਹਾ ਹੈ । ਉਹ ਜਿਊਂਦੇ ਜੀ ਸ਼੍ਰੋਮਣੀ ਕਮੇਟੀ ਤੋਂ ਕਬਜ਼ਾ ਨਹੀਂ ਛੱਡਣਾ ਚਾਹੁੰਦਾ । ਕਿਉਂਕਿ ਸ਼੍ਰੋਮਣੀ ਕਮੇਟੀ ਤੋਂ ਕਬਜ਼ਾ ਹੱਟ ਜਾਣ ਮਗਰੋਂ ਉਸ ਦੇ ਸਾਰੇ ਪਾਜ ਉਘੜਨੇ ਹਨ । ਉਸ ਵਲੋਂ ਅਤੇ ਉਸ ਦੇ ਚੱਟੇ-ਵਟਿਆਂ ਹਥੋਂ ਹੋਈ ਦਰਬਾਰ ਸਾਹਿਬ ਦੀ ਲੁੱਟ ਦਾ ਭਾਂਡਾ ਭੱਜਣਾ ਹੈ । ਦਰਬਾਰ ਸਾਹਿਬ ਵਿਚ ਹੋਏ ਅਤੇ ਹੋ ਰਹੇ ਕੁਕਰਮਾਂ ਦਾ ਭਾਂਡਾ ਭੱਜਣਾ ਹੈ । ਬੰਦੇ ਲਈ ਸਭ ਤੋਂ ਵੱਡਾ ਦੁਸ਼ਮਣ ਉਸ ਦੇ ਮਨ ਦਾ ਚੋਰ ਹੁੰਦਾ ਹੈ , ਅਤੇ ਬਾਦਲ ਦੇ ਮਨ ਨੂੰ ਤਾਂ ਪਤਾ ਹੈ ਕਿ ਉਸ ਨੇ ਕੀ ਕੁਝ ਕੀਤਾ ਹੋਇਆ ਹੈ , ਉਹ ਉਸ ਤੋਂ ਹੀ ਡਰਦਾ ਹੈ ।
      ਇਸ ਲਈ ਉਹ ਅਪਣੇ ਵਿਰੁੱਧ ਕੋਈ ਅਜਿਹੀ ਆਵਾਜ਼ ਨਹੀਂ ਸੁਣਨੀ ਚਾਹੁੰਦਾ , ਜਿਸ ਦੇ ਆਧਾਰ ਤੇ ਉਸ ਹੱਥੋਂ ਸ਼੍ਰੋਮਣੀ ਕਮੇਟੀ ਦੀ ਵਾਗਡੋਰ ਖੁਸਦੀ ਦਿਸੇ , ਭਾਵੇਂ ਉਹ ਆਵਾਜ਼ ਪੰਜਾਬ ਦੇ ਕਿਸਾਨਾਂ ਦੀ ਹੋਵੇ , ਜਾਂ ਸਮਾਜ ਨਿਰਮਾਤਾ , ਮਾਸਟਰਾਂ ਦੀ ਹੋਵੇ , ਜਾਂ ਪੰਜਾਬ ਦੇ ਮੁਲਾਜ਼ਮਾਂ ਦੀ ਹੋਵੇ । ਅਜਿਹੇ ਲੋਕਾਂ ਦੀ ਆਵਾਜ਼ ਦਬਾਉਣ ਲਈ ਉਹ ਪੁਲਸ ਦੇ ਡੰਡੇ ਦੀ ਖੁਲ੍ਹ ਕੇ ਦੁਰਵਰਤੋਂ ਕਰ ਰਿਹਾ ਹੈ , ਜਦ ਕਿ ਇਹ ਲੋਕ ਅਸਮਾਜਕ ਬੰਂਦਿਆਂ ਵਜੋਂ ਨਹੀਂ ਗਿਣੇ ਜਾ ਸਕਦੇ । ਜਿਸ ਮੁਲਕ ਦੇ ਮਾਸਟਰਾਂ ਦੀ ਹੀ , ਸਰਕਾਰ ਖੁੱਲ੍ਹੇ ਆਮ ਪੁਲਸ ਦੀ ਮਾਰ ਕੁੱਟ ਨਾਲ ਨਿਰਾਦਰੀ ਕਰੇਗੀ , ਉਸ ਮੁਲਕ ਵਿਚ ਇੰਸਾਨੀਅਤ ਕਿਥੋਂ ਪੈਦਾ ਹੋ ਜਾਵੇ ਗੀ ? ਏਨੀ ਜਿਹੀ ਗੱਲ ਹੀ ਬਾਦਲ ਸਾਹਿਬ ਦੀ ਸਮਝ ਤੋਂ ਬਾਹਰੀ ਹੈ । ਇਸ ਕਾਰਨ ਹੀ ਪੰਜਾਬ ਵਿਦਿਆ ਦੇ ਖੇਤ੍ਰ ਵਿਚ ਨਿਰੰਤ੍ਰ ਪਛੜਦਾ ਜਾ ਰਿਹਾ ਹੈ ।   
    ਜੇ ਉਹ ਆਵਾਜ਼ , ਪ੍ਰੋ. ਦਰਸ਼ਨ ਸਿੰਘ ਵਰਗੇ ਕਿਸੇ ਧਾਰਮਿਕ ਵਿਅਕਤੀ ਦੀ ਹੋਵੇ, ਤਾਂ ਬਾਦਲ ਦੇ ਜੁੱਤੀ ਚੱਟ , ਅਖੌਤੀ ਤਖਤਾਂ ਦੇ ਅਖੌਤੀ ਜਥੇਦਾਰ , ਬਰਸਾਤੀ ਡੱਡੂਆਂ ਵਾਙ ਭੁੜਕ-ਭੁੜਕ ਕੇ ਉਸ ਨੂੰ ਪੰਥ ਵਿਚੋ ਛੇਕਣ ਦਾ ਅਣਅਧਿਕਾਰਤ ਕਰਮ ਕਰ ਕੇ ਉਸ  ਦੀ ਆਵਾਜ਼ ਬੰਦ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ , ਜੇ ਫਿਰ ਵੀ ਉਹ ਸੰਗਤ ਦੇ ਬਲ-ਬੂਤੇ ਤੇ ਕੁਝ ਬੋਲਣ ਦਾ ਯਤਨ ਕਰੇ ਤਾਂ ਗੁੰਂਡਿਆਂ ਹੱਥੋਂ ਉਨ੍ਹਾਂ ਦੀ ਮਾਰ ਕੁਟਾਈ ਕਰਵਾ ਕੇ ਆਵਾਜ਼ ਬੰਦ ਕਰਨ ਦਾ ਉਪ੍ਰਾਲਾ ਕੀਤਾ ਜਾਂਦਾ ਹੈ ।
      ਜੇ ਉਹ ਆਵਾਜ਼ , ਇੰਡੀਆ ਅਵੇਅਰਨੈਸ ਜਾਂ ਸਪੋਕਸਮੈਨ ਦੀ ਹੋਵੇ ਤਾਂ ਉਨ੍ਹਾਂ ਵਿਰੁੱਧ , ਹਿੰਦੂ ਵਾਦ ਦੀਆਂ ਗੁਲਾਮ ਉਨ੍ਹਾਂ ਕੋਰਟਾਂ ਵਿਚ ਮੁਕੱਦਮੇ ਪਾਏ ਜਾਂਦੇ ਹਨ , ਜੋ ਸਿੱਖਾਂ ਵਿਰੁੱਧ ਇੰਸਾਫ ਦਾ ਡਰਾਮਾ ਕਰਦਿਆਂ , ਮਹੀਨਿਆਂ ਵਿਚ ਹੀ ਫੈਸਲੇ ਸੁਣਾ ਦਿੰਦੇ ਹਨ । ਪਰ ਜੇ ਉਹੀ ਕੇਸ , ਘੱਟ ਗਿਣਤੀਆਂ ਦੇ ਹੱਕ ਵਿਚ ਹੋਣ ਤਾਂ , ਇੰਸਾਫ ਨੂੰ ਤਦ ਤੱਕ ਲਮਕਾਇਆ ਜਾਂਦਾ ਹੈ , ਜਦ ਤੱਕ ਇੰਸਾਫ ਮੰਗਣ ਵਾਲੇ ਆਪੇ ਹੀ ਥੱਕ ਕੇ ਘਰ ਨਾ ਬੈਠ ਜਾਣ । ਜਾਂ ਦੋਸ਼ੀ ਅਪਣੀ ਮੌਤ ਆਪ ਹੀ ਨਾ ਮਰ ਜਾਣ ।
    ਕੁਦਰਤ ਵਲੋਂ ਇਹ , ਇਸ ਗੱਲ ਦਾ ਸਪੱਸ਼ਟ ਸੰਦੇਸ਼ ਹੈ ਕਿ ਬਾਦਲ ਦੇ ਪਾਪ ਦਾ ਘੜਾ ਭੱਰ ਚੁੱਕਾ ਹੈ । ਪਰ ਜੇ ਉਸ ਦੇ ਮੁਖਾਲਿਫ , ਇਕੱਠੇ ਹੋ ਕੇ ਉਸ ਦਾ ਮੁਕਾਬਲਾ ਕਰਨ ਦੀ ਥਾਂ , ਆਪਸ ਵਿਚ ਹੀ , ਇਕ ਦੂਸਰੇ ਨੂੰ ਹੀ ਨੀਵਾਂ ਵਿਖਾਉਣ ਦੇ ਆਹਰ ਵਿਚ ਲੱਗੇ ਰਹਣ ਗੇ , ਤਾਂ ਇਸ ਹਾਲਤ ਵਿਚ ਇਹੀ ਕਿਹਾ ਜਾ ਸਕਦਾ ਹੈ ਕਿ ਉਨ੍ਹਾਂ ਦੀ ਕਿਸਮਤ ਵਿਚ ਸੌ ਗੰਢੇ ਅਤੇ ਸੌ ਛਿਤ੍ਰ , ਦੋਵੇਂ ਹੀ ਖਾਣੇ ਜਿਖੇ ਹੋਏ ਹਨ ।
   ਭਲੇ ਲੋਕੋ ਆਪਸੀ ਕਲ੍ਹਾ ਤਾਂ ਮਗਰੋਂ ਕਰ ਲਿਉ , ( ਕਿਉਂਕਿ ਹਉਮੈ ਨੇ ਤੁਹਾਡੀ ਕਿਸਮਤ ਵਿਚ ਕੁੱਕੜ ਖੇਹ ਉਢਾਉਣੀ ਤਾਂ ਲਿਖ ਹੀ ਦਿੱਤੀ ਹੈ ) ਪਹਿਲਾਂ ਸਮਾਜ ਦੇ ਦੁਸ਼ਮਣ ਨੂੰ  (ਜੋ ਸਭ ਕੁਝ ਪਰਾਇਆਂ ਹੱਥ ਵੇਚ ਚੁੱਕਾ ਹੈ ) ਤਾਂ ਪੰਥ ਦੇ ਵੇਹੜੇ ਵਿਚੋਂ ਬਾਹਰ ਕੱਢ ਲਵੋ , ਇਹੀ ਸਮੇ ਦੀ ਆਵਾਜ਼ ਹੈ ।
                                                             ਅਮਰ ਜੀਤ ਸਿੰਘ ਚੰਦੀ