ਚੀਨ ਕਿਸੇ ਵੀ ਦੇਸ਼ ਵਲੋਂ ਤਾਇਵਾਨ ਨੂੰ ਹਥਿਆਰ ਦਿੱਤੇ ਜਾਣ ਦੇ ਖਿਲਾਫ
ਬੀਜਿੰਗ, 14 ਜਨਵਰੀ (ਪੰਜਾਬ ਮੇਲ)-
ਚੀਨ ਨੇ ਤਾਇਵਾਨ ਨੂੰ ਪਣ-ਡੁੱਬੀ ਬਣਾਉਣ ਲਈ ਤਕਨੀਕ ਦੇਣ ਦਾ ਸੋਮਵਾਰ ਨੂੰ ਸਖਤ ਵਿਰੋਧ ਕੀਤਾ ਹੈ ਤੇ ਕਿਹਾ ਹੈ ਕਿ ਬੀਜਿੰਗ ਨਾਲ ਰਿਸ਼ਤਾ ਰੱਖਣ ਵਾਲੇ ਦੇਸ਼ਾਂ ਨੂੰ ‘ਇਕ ਚੀਨ’ ਸਿਧਾਂਤ ਦਾ ਈਮਾਨਦਾਰੀ ਨਾਲ ਪਾਲਣ ਕਰਨਾ ਚਾਹੀਦਾ ਤੇ ਤਾਇਵਾਨ ਨਾਲ ਕਿਸੇ ਵੀ ਤਰ੍ਹਾਂ ਦੇ ਫੌਜੀ ਸਬੰਧ ਨੂੰ ਰੋਕ ਦੇਣਾ ਚਾਹੀਦਾ ਹੈ।
ਤਾਇਵਾਨ ਮੀਡੀਆ ਨੇ ਪਿਛਲੇ ਸਾਲ ਖਬਰ ਦਿੱਤੀ ਸੀ ਕਿ ਅਮਰੀਕਾ ਦੇ ਵਿਦੇਸ਼ ਵਿਭਾਗ ਨੇ ਉਸ ਨੂੰ ਤਕਨੀਕ ਦੇਣ ਦੀ ਮਨਜ਼ੂਰੀ ਦੇ ਦਿੱਤੀ ਹੈ, ਜਿਸ ਨਾਲ ਤਾਇਵਾਨ ਆਪਣੀਆਂ ਪਣ-ਡੁੱਬੀਆਂ ਖੁਦ ਹੀ ਬਣਾ ਸਕੇਗਾ। ਅਜਿਹੀ ਖਬਰ ਆਈ ਸੀ ਕਿ 6 ਵਿਦੇਸ਼ੀ ਕੰਪਨੀਆਂ ਪਹਿਲਾਂ ਹੀ ਪਣ-ਡੁੱਬੀਆਂ ਲਈ ਡਿਜ਼ਾਇਨ ਪ੍ਰਸਤਾਵ ਸੌਂਪ ਚੁੱਕੀਆਂ ਹਨ। ਉਨ੍ਹਾਂ ‘ਚੋਂ ਇਕ ਕੰਪਨੀ ਭਾਰਤ ਦੀ ਹੈ।
ਤਾਇਵਾਨ ਨਿਊਜ਼ ਨੇ ਪਿਛਲੇ ਸਾਲ ਅਕਤੂਬਰ ‘ਚ ਖਬਰ ਦਿੱਤੀ ਸੀ ਕਿ ਇਨ੍ਹਾਂ 6 ਕੰਪਨੀਆਂ ‘ਚ 2 ਯੂਰਪੀ, ਦੋ ਅਮਰੀਕੀ, ਇਕ ਭਾਰਤੀ ਤੇ ਇਕ ਜਾਪਾਨੀ ਕੰਪਨੀ ਸ਼ਾਮਲ ਹੈ। ਖਬਰ ‘ਚ ਇਨ੍ਹਾਂ ਦੇਸ਼ਾਂ ਦੀਆਂ ਕੰਪਨੀਆਂ ਦਾ ਬਿਓਰਾ ਨਹੀਂ ਹੈ।
ਸੋਮਵਾਰ ਨੂੰ ਇਥੇ ਚੀਨ ਦੀ ਸਰਕਾਰੀ ਮੀਡੀਆ ਦੇ ਇਕ ਸਵਾਲ ਦਾ ਜਵਾਬ ਦਿੰਦੇ ਹੋਏ ਵਿਦੇਸ਼ ਮੰਤਰਾਲੇ ਦੀ ਬੁਲਾਰਨ ਹੁਆ ਚੁਮਯੰਗ ਨੇ ਮੀਡੀਆ ਬ੍ਰੀਫਿੰਗ ਦੌਰਾਨ ਕਿਹਾ ਕਿ ਚੀਨ ਕਿਸੇ ਵੀ ਦੇਸ਼ ਵਲੋਂ ਤਾਇਵਾਨ ਨੂੰ ਹਥਿਆਰ ਦਿੱਤੇ ਜਾਣ ਦੇ ਖਿਲਾਫ ਹੈ। ਉਨ੍ਹਾਂ ਕਿਹਾ ਕਿ ਚੀਨ ਤਾਇਵਾਨ ਨਾਲ ਕਿਸੇ ਵੀ ਦੇਸ਼ ਦੇ ਫੌਜੀ ਸਬੰਧ ਦੇ ਬਿਲਕੁਲ ਖਿਲਾਫ ਹੈ। ਚੀਨ ਦਾ ਰੁਖ ਸਪੱਸ਼ਟ ਤੇ ਹਮੇਸ਼ਾ ਇਕੋ ਜਿਹਾ ਹੈ। ਅਮਰੀਕਾ ਤੇ ਹੋਰ ਦੇਸ਼ ਇਸ ਮੁੱਦੇ ਦੀ ਸੰਵੇਦਨਸ਼ੀਲਤਾ ਤੇ ਖਤਰੇ ਨੂੰ ਪੂਰੀ ਤਰ੍ਹਾਂ ਸਮਝਦੇ ਹਨ। ਚੀਨ ਤਾਇਵਾਨ ‘ਤੇ ਦਾਅਵਾ ਕਰਦਾ ਰਿਹਾ ਹੈ। ਉਹ 1949 ‘ਚ ਉਸ ਤੋਂ ਵੱਖ ਹੋਇਆ ਸੀ। ਉਹ ਤਾਇਵਾਨ ਨਾਲ ਕਿਸੇ ਵੀ ਦੇਸ਼ ਦੇ ਡਿਪਲੋਮੈਟਕਿ ਸਬੰਧ ਦੇ ਖਿਲਾਫ ਹੈ।