ਅੱਜ ਇਕ ਦਿਨ ਵਿਚ ਹੀ ਕੋਮ ਦੇ ਅਰਬਾਂ ਰੁਪਏ ਠੰਡੇ ਮਿੱਠੇ ਪਾਣੀ ਵਿਚ ਰੋੜ ਦਿਤੇ ਜਾਣਗੇ :
ਹਰਜੀਤ ਸਿੰਘ ਜਲੰਧਰ
ਇਸ ਪੈਸੇ ਨਾਲ ਕੌਮ ਦੀ ਵਿਗੜੀ  ਹਾਲਤ ਸਵਾਰਨ ਦੀ ਲੋੜ
ਅਨੰਦਪੁਰ ਸਾਹਿਬ, 11 ਜੂਨ (ਸੁਰਿੰਦਰ ਸਿੰਘ ਸੋਨੀ):ਭਾਂਵੇ ਸਿੱਖ ਕੌਮ ਦਾ ਇਤਹਾਸ ਸ਼ਹੀਦਾਂ  ਦੇ ਖੂਨ ਨਾਲ ਰੰਗਿਆ ਪਿਆ ਹੈ ਪਰ ਅੱਜ  ਸਿੱਖਾਂ ਨੇ ਹੀ ਆਪਣੇ ਇਤਹਾਸ ਨਾਲ ਇਨਸਾਫ ਨਹੀ ਕੀਤਾ। ਇਸ ਦੀ ਤਾਜਾ ਮਿਸਾਲ ਅੱਜ ਮਨਾਏ ਜਾ ਰਹੇ ਸ਼੍ਰੀ ਗੁਰੂ ਅਰਜਨ ਸਾਹਿਬ ਜੀ ਦੇ ਸ਼ਹੀਦੀ ਦਿਹਾੜੇ ਤੋ ਦੇਖੀ ਜਾ ਸਕਦੀ ਹੈ। ਇਨਾਂ ਸ਼ਬਦਾਂ ਦਾ ਪ੍ਰਗਟਾਵਾ ਸਿੱਖ ਫੁਲਵਾੜੀ ਦੇ ਸੰਪਾਦਕ ਭਾਈ ਹਰਜੀਤ ਸਿੰਘ ਨੇ ਕੀਤਾ । ਉਨਾਂ ਕਿਹਾ ਕਿੰਨੀ ਹੈਰਾਨੀ ਦੀ ਗੱਲ ਹੈ ਕਿ ਇਕ ਦਿਨ ਵਿਚ ਹੀ ਕੋਮ ਦੇ ਅਰਬਾਂ ਰੁਪਏ ਠੰਡੇ ਮਿੱਠੇ ਪਾਣੀ ਵਿਚ ਰੋੜ ਦਿਤੇ ਜਾਣਗੇ ਜਦੋ ਕਿ ਕੌਮ ਦੇ ਬਹੁਤ ਸਾਰੇ ਗੁਰਸਿੱਖਾਂ ਕੋਲ ਰੋਜ ਮਰਾ ਦੀ ਜਿੰਦਗੀ ਦੀਆਂ ਲੋੜਾਂ ਵੀ ਪੂਰੀਆਂ ਨਹੀ ਹੋ ਰਹੀਆਂ। ਉਨਾਂ ਕਿਹਾ ਕਿ ਭਾਂਵੇ ਕੋਮ ਵਲੋ ਹਰ ਸਾਲ ਸ਼ਹੀਦੀ ਦਿਹਾੜਾ ਮਨਾਇਆ ਜਾਦਾਂ ਹੈ ਪਰ ਇਸ ਪੁਰਬ ਨੂੰ ਛਬੀਲਾ ਵਾਲਾ ਪੁਰਬ ਮੰਨ ਲਿਆ ਗਿਆ ਹੈ ਤੇ ਠੰਡੇ ਮਿੱਠੇ ਪਾਣੀ ਤੋ ਅੱਗੇ ਵਧ ਕੇ ਕੋਲਡ ਡਰਿੰਕ,ਆਇਸ ਕਰੀਮ,ਪੂਰੀਆਂ ਛੋਲੇ,ਜਲ ਜੀਰਾ ਤੇ ਹੋਰ ਭਾਂਤ ਭਾਂਤ ਦੇ ਲੰਗਰ ਲਾ ਕੇ ਚੁਲਬੁਲਾ ਵਾਤਾਵਰਣ ਤਿਆਰ ਕਰ ਦਿਤਾ ਗਿਆ ਹੈ ਜੋ ਸਿੱਖੀ ਸਿਧਾਤਾਂ ਤੇ ਗਹਿਰੀ ਸੱਟ ਮਾਰਦਾ ਹੈ।
ਉਨਾਂ ਕਿਹਾ ਕਿ ਅੱਜ ਕੌਮ ਦੇ ਵੱਡੇ ਹਿੱਸੇ ਸਿਕਲੀਗਰ ਸਿੱਖਾਂ ਦੀ ਤਰਸਯੋਗ ਹਾਲਤ ਵੱਲ ਧਿਆਨ ਨਹੀ ਦਿਤਾ ਜਾ ਰਿਹਾ ਜਦੋ ਕਿ ਕੌਮ ਦੇ ਅਰਬਾਂ ਰੁਪਏ ਰੱਜਿਆਂ ਨੂੰ ਹੀ ਭਾਂਤ ਭਾਂਤ ਦੇ ਪਾਣੀ ਪਿਲਾ ਕੇ ਰੋਲੇ ਜਾ ਰਹੇ ਹਨ,ਇਹ ਸਿੱਖ ਕੌਮ ਦੀ ਗੈਰ ਜਿੰਮੇਵਾਰਾਨਾ ਰਿਵਾਇਤ ਪੈ ਰਹੀ ਹੈ ਜੋ ਕੌਮ ਲਈ ਹਾਨੀਕਾਰਕ ਸਾਬਤ ਹੋ ਰਹੀ ਹੈ। ਭਾਈ ਹਰਜੀਤ ਸਿੰਘ ਨੇ ਕਿਹਾ ਕਿ ਇਉ ਪਰਤੀਤ ਹੁੰਦਾ ਹੈ ਕਿ ਸਿੱਖਾਂ ਨੇ ਸ਼ਬਦ ਗੁਰੂ ਦੇ ਲੰਗਰ ਨੂੰ ਭੁਲਾ ਦਿਤਾ ਹੈ ਤੇ ਕਈ ਕਿਸਮਾਂ ਦੇ ਮਿੱਠੇ ਪਾਣੀਆਂ ਦੇ ਲੰਗਰ ਲਾ ਕੇ ਆਪਣੇ ਦਸਵੰਧ ਦੀ ਕੁਵਰਤੋ ਕਰਨ ਦੀ ਆਦਤ ਪਾ ਲਈ ਹੈ। ਉਨਾਂ ਕਿਹਾ ਕਿ ਸਿੱਖ ਦਾ ਦਸਵੰਧ ਆਪਣਾ ਨਹੀ ਸਗੋ ਗੁਰੂ ਦਾ ਹੈ ਤੇ ਸਿੱਖ ਨੂੰ ਕੋਈ ਹੱਕ ਨਹੀ ਕਿ ਦਸਵੰਧ ਦੀ ਰਕਮ ਦਾ ਗਲਤ ਪ੍ਰਯੋਗ ਕਰੇ। ਉਨਾਂ ਕਿਹਾ ਕਿ ਕਿੰਨਾ ਚੰਗਾ ਹੋਵੇ ਜੇਕਰ ਇਸ ਪੈਸੇ ਦੇ ਕੁਛ ਹਿੱਸੇ ਨੂੰ ਕੌਮ ਦੀ ਪਨੀਰੀ ਬੱਚਿਆਂ ਦੀ ਸੰਭਾਲ ਤੇ ਨਸ਼ਿਆਂ ਵਿਚ ਖੱਚਤ ਹੋ ਚੁਕੇ ਨੋਜਵਾਨਾਂ ਦੀ ਭਲਾਈ ਹਿਤ ਖਰਚਿਆ ਜਾਵੇ ਤਾਂ ਕੋਮ ਦੀ ਵਿਗੜੀ ਹਾਲਤ ਵਿਚ ਸੁਧਾਰ ਦੀ ਆਸ ਪੈਦਾ ਹੋ ਸਕਦੀ ਹੈ।
ਉਨਾਂ ਕਿਹਾ ਕਿ ਜੇਕਰ ਸਿੱਖ ਕੇਵਲ ਪੰਜ ਸਾਲ ਹੀ ਗੁਰਪੁਰਬਾਂ ਤੇ ਨਗਰ ਕੀਰਤਨਾਂ ਤੇ ਕੀਤੇ ਜਾ ਰਹੇ ਫਾਲਤੂ ਖਰਚ ਨੂੰ ਕੰਟਰੋਲ ਕਰ ਲੈਣ ਤੇ ਇਸ ਪੈਸੇ ਨਾਲ ਲੋੜਵੰਦਾਂ ਦੀ ਮਦਦ ਕਰਨ ਤਾਂ ਕੋਈ ਵੀ ਸਿੱਖ ਗਰੀਬ ਨਹੀ ਰਹੇਗਾ। ਉਨਾਂ ਕਿਹਾ ਕਿ ਇਕ ਮੋਟੇ ਅੰਦਾਜੇ ਮੁਤਾਬਕ ਇਸ ਦਿਨ ਸੰਸਾਰ ਭਰ ਦੇ ਸਿੱਖਾਂ ਵਲੋ ਲਾਈਆਂ ਜਾਂਦੀਆਂ ਛਬੀਲਾਂ ਤੇ ਜਿੰਨਾ ਖਰਚ ਹੁੰਦਾ ਹੈ ਉਸ ਪੈਸੇ ਨਾਲ ਗਰੀਬ ਸਿੱਖਾਂ ਲਈ 10 ਲੱਖ ਨਵੇਂ ਮਕਾਨ ਬਣਾਏ ਜਾ ਸਕਦੇ ਹਨ। ਜੇਕਰ ਕੌਮ ਦੇ ਆਗੂ ਸਿੱਖ ਕੋਮ ਦੀ ਇਸ ਸ਼ਕਤੀ ਨੂੰ ਉਸਾਰੂ ਰੂਪ ਵਿਚ ਵਰਤਣ ਲਈ ਹੰਭਲਾ ਮਾਰਨ ਤਾਂ ਇਹ ਬਹੁਤ ਵੱਡੀ ਪ੍ਰਾਪਤੀ ਹੋ ਸਕਦੀ ਹੈ।