ਕਵਿਤਾਵਾਂ
ਇਕ ਤਾਂਘ ਭਜਾਈ ਫਿਰਦੀ ਹੈ।
Page Visitors: 2553
ਇਕ ਤਾਂਘ ਭਜਾਈ ਫਿਰਦੀ ਹੈ।
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ
ਇਕ ਤਾਂਘ ਭਜਾਈ ਫਿਰਦੀ ਹੈ।
ਇਕ ਖਿੱਚ ਘੁਕਾਈ ਫਿਰਦੀ ਹੈ।
ਇਕ ਹੂਕ ਵਿਛੋੜੇ ਦੀ ਉੱਠੇ,
ਵਿਸ਼ਵਾਸ਼ ਬਣਾਈ ਫਿਰਦੀ ਹੈ।
ਇਹ ਆਪਾ ਟੁੱਟ ਟੁੱਟ ਜਾਂਦਾ ਹੈ,
ਇਕ ਯਾਦ ਜੁੜਾਈ ਫਿਰਦੀ ਹੈ।
ਮਿਲ ਵੇਲਾ ਕਦ, ਤੇਰੇ ਦੀਦ ਕਦੋਂ,
ਇਕ ਆਸ ਘੁਮਾਈ ਫਿਰਦੀ ਹੈ।
ਤੂੰ ਸਾਂਭੇਂਗਾ? ਦੁਰਕਾਰੇਂਗਾ?
ਇਕ ਸੋਚ ਸਤਾਈ ਫਿਰਦੀ ਹੈ।
ਜੋ ਯਾਦ ਕਰੇ, ਸੋ ਪਾਰ ਪਵੇ,
ਤੇਰੇ ਨਾ ਦੀ ਦੁਹਾਈ ਫਿਰਦੀ ਹੈ।
ਜਪ ਨਾਮ ਤੇ ਤਰ ਭਵਸਾਗਰ ਨੂੰ,
ਰੂਹ ਦਿਲ ਸਮਝਾਈ ਫਿਰਦੀ ਹੈ।
ਮਿਲਿਆਂ ਹੀ ਸੱਚ ਦੀ ਸਮਝ ਮਿਲੂ,
ਮਿਲ ਮਿਟਣ ਦੀ ਲਾਈ ਫਿਰਦੀ ਹੈ।
ਇਕ ਤਾਂਘ ਭਜਾਈ ਫਿਰਦੀ ਹੈ।
ਇਕ ਖਿੱਚ ਘੁਕਾਈ ਫਿਰਦੀ ਹੈ।