ਓਂਟਾਰੀਓ ਸੂਬਾਈ ਚੋਣਾਂ ‘’ਚ ਲਿਬਰਲਾਂ ਨੇ ਫੇਰਿਆ ਹੂੰਝਾ,
ਪੰਜ ਪੰਜਾਬੀ ਜੇਤੂ
ਟੋਰਾਂਟੋ :- ਕੈਨੇਡਾ ਦੇ ਆਬਾਦੀ ਪੱਖੋਂ ਸਭ ਤੋਂ ਵੱਡੇ ਅਤੇ ਪੰਜਾਬੀਆਂ ਦੇ ਚਹੇਤੇ ਪ੍ਰਾਂਤ ਉਂਟਾਰੀਓ ਵਿਚ ਵਿਧਾਨ ਸਭਾ ਦੀ ਹੋਈ ਮੱਧਕਾਲੀ ਚੋਣ ਵਿਚ ਲਿਬਰਲ ਪਾਰਟੀ ਦੀ ਲਗਾਤਾਰ ਚੌਥੀ ਵਾਰ ਜਿੱਤ ਹੋਈ ਹੈ | 107 ਵਿਚੋਂ ਲਿਬਰਲ ਪਾਰਟੀ ਨੂੰ 58 ਸੀਟਾਂ 'ਤੇ ਸਫਲਤਾ ਮਿਲੀ ਹੈ ਅਤੇ ਮੁੱਖ ਮੰਤਰੀ ਕੈਥਲਿਨ ਵਿੱਨ ਵੱਲੋਂ ਬਹੁ-ਸੰਮਤੀ ਸਰਕਾਰ ਦਾ ਗਠਨ ਕੀਤਾ ਜਾਵੇਗਾ | ਲਿਬਰਲ ਪਾਰਟੀ ਦਾ 2003 ਤੋਂ ਉਂਟਾਰੀਓ ਵਿਚ ਰਾਜ ਹੈ | ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਪਾਰਟੀ ਨੂੰ 27 ਅਤੇ ਨਿਊ ਡੈਮੋਕਰੇਟਿਕ ਪਾਰਟੀ ਦੀ 22 ਸੀਟਾਂ 'ਤੇ ਜਿੱਤ ਹੋਈ ਹੈ | ਲਿਬਰਲ ਪਾਰਟੀ ਤੋਂ ਹਰਿੰਦਰਜੀਤ ਸਿੰਘ ਤੱਖਰ, ਅੰਮਿ੍ਤ ਮਾਂਗਟ ਅਤੇ ਵਿੱਕ ਢਿੱਲੋਂ ਨੇ ਲਗਾਤਾਰ ਚੌਥੀ ਵਾਰ ਮਿਸੀਸਾਗਾ ਅਤੇ ਬਰੈਂਪਟਨ ਤੋਂ ਆਪਣੀਆਂ ਸੀਟਾਂ ਤੋਂ ਸ਼ਾਨਦਾਰ ਜਿੱਤ ਪ੍ਰਾਪਤ ਕੀਤੀ ਹੈ | ਹਰਿੰਦਰ ਮੱਲ੍ਹੀ (ਲਿਬਰਲ ਪਾਰਟੀ) ਨੇ ਪੰਜਾਬੀਆਂ ਦੇ ਗੜ੍ਹ ਬਰੈਂਪਟਨ-ਸਪਰਿੰਗਡੇਲ ਹਲਕੇ ਦੀ ਸੀਟ ਜਿੱਤੀ ਹੈ ਅਤੇ ਆਪਣੇ ਨਿਕਟ ਵਿਰੋਧੀ ਗੁਰਪ੍ਰੀਤ ਸਿੰਘ ਢਿੱਲੋਂ (ਨਿਊ ਡੈਮੋਕਰੇਟਿਕ ਪਾਰਟੀ) ਨੂੰ 3000 ਤੋਂ ਵੱਧ ਵੋਟਾਂ ਦੇ ਫਰਕ ਨਾਲ ਹਰਾਇਆ | ਪੰਜਾਬੀਆਂ ਦੀ ਚੋਖੀ ਵਸੋਂ ਵਾਲੇ ਇਕ ਹੋਰ ਹਲਕੇ ਬਰੈਮਲੀ-ਗੋਰ-ਮਾਲਟਨ ਤੋਂ ਨਿਊ ਡੈਮੋਕਰੇਟਿਕ ਪਾਰਟੀ ਦੇ ਜਗਮੀਤ ਸਿੰਘ ਨੇ ਲਿਬਰਲ ਪਾਰਟੀ ਦੇ ਡਾ: ਕੁਲਦੀਪ ਕੁਲਾਰ ਨੂੰ ਲਗਭਗ 4700 ਵੋਟਾਂ ਦੇ ਫਰਕ ਨਾਲ ਮਾਤ ਦਿੱਤੀ ਅਤੇ ਦੂਸਰੀ ਵਾਰ ਇਹ ਸੀਟ ਜਿੱਤ ਲਈ | ਪਾਕਿਸਤਾਨੀ ਮੂਲ ਦੇ ਸ਼ਫੀਕ ਕਾਦਰੀ ਅਤੇ ਯਾਸਰ ਨਕਵੀ (ਦੋਵੇਂ ਲਿਬਰਲ ਪਾਰਟੀ ਦੇ ਉਮੀਦਵਾਰ) ਨੇ ਟੋਰਾਂਟੋ (ਈਟੋਬੀਕੋ-ਉੱਤਰੀ) ਅਤੇ ਓਟਾਵਾ ਸੈਂਟਰ ਤੋਂ ਜਿੱਤ ਹਾਸਲ ਕੀਤੀ ਹੈ | ਭਾਰਤੀ ਮੂਲ ਦੀ ਦੀਪਕਾ ਦਮਰੀਲਾ (ਮਿਸੀਸਾਗਾ-ਪੂਰਬੀ ਕੁਕਸਵਿਲ) ਅਤੇ ਇੰਦਰਾ ਨਾਇਡੂ (ਹਾਲਟਨ ਖੇਤਰ) ਤੋਂ ਲਿਬਰਲ ਪਾਰਟੀ ਲਈ ਜਿੱਤ ਪ੍ਰਾਪਤ ਕੀਤੀ ਹੈ |