ਗੁਰਜਤਿੰਦਰ ਸਿੰਘ ਰੰਧਾਵਾ, ਮੁੱਖ ਸੰਪਾਦਕ 916-320-9444
ਮਿਹਨਤ ਅਤੇ ਅਥਾਹ ਘਾਲਣਾਵਾਂ ਕਰਕੇ ਪੈਸਾ ਕਮਾਇਆ ਹੈ ਅਤੇ ਚੰਗੇ ਕਾਰੋਬਾਰ ਸਥਾਪਿਤ ਕੀਤੇ ਹਨ। ਇਸ ਗੱਲ ਤੋਂ ਸਾਫ ਹੁੰਦਾ ਹੈ ਕਿ ਮਿਹਨਤ ਅਤੇ ਇਮਾਨਦਾਰੀ ਨਾਲ ਕੀਤੇ ਕੰਮ ਦੇ ਸਿਰ ’ਤੇ ਹੀ ਕੋਈ ਵਿਅਕਤੀ ਆਪਣੇ ਕਾਰੋਬਾਰ ਸਥਾਪਿਤ ਕਰ ਸਕਦਾ ਹੈ ਅਤੇ ਸਮਾਜ ਅੰਦਰ ਨਾਮਨਾ ਖੱਟ ਸਕਦਾ ਹੈ। ਨਸ਼ਿਆਂ ਦੇ ਵਪਾਰ ਰਾਹੀਂ ਕਮਾਏ ਪੈਸੇ ਨਾਲ ਵਕਤੀ ਤੌਰ ’ਤੇ ਤਾਂ ਕੋਈ ਸ਼ੌਹਰਤ ਹਾਸਲ ਕਰ ਸਕਦਾ ਹੈ ਅਤੇ ਲੋਕਾਂ ਤੋਂ ਵਾਹ-ਵਾਹ ਕਰਵਾ ਸਕਦਾ ਹੈ। ਸਮਾਜ ਸੇਵਕ ਹੋਣ ਦਾ ਭਰਮ ਪਾਲ ਸਕਦਾ ਹੈ। ਪਰ ਆਖਰ ਅਜਿਹੇ ਲੋਕਾਂ ਦਾ ਪਰਦਾਫਾਸ਼ ਹੋ ਹੀ ਜਾਂਦਾ ਹੈ। ਵੱਡੇ-ਵੱਡੇ ਖੇਡ ਮੇਲੇ ਕਰਵਾਉਣ, ਸੱਭਿਆਚਾਰਕ ਪ੍ਰੋਗਰਾਮ ਕਰਵਾਉਣ ਅਤੇ ਗਰੀਬਾਂ ਨੂੰ ਸਹਾਇਤਾ ਕਰਨ ਦਾ ਅਡੰਬਰ ਰਚਨ ਵਾਲਿਆਂ ਦਾ ਦਿਨ-ਬ-ਦਿਨ ਪਰਦਾਫਾਸ਼ ਹੋ ਰਿਹਾ ਹੈ ਅਤੇ ਫਿਰ ਇਨ੍ਹਾਂ ਦੀ ਅਸਲ ਹਕੀਕਤ ਸਾਡੇ ਸਾਹਮਣੇ ਹੈ। ਬਿਨਾਂ ਮਿਹਨਤ ਝੱਟਪਟ ਧਨਵਾਨ ਹੋਣ ਦੀ ਲਾਲਸਾ ਇਸ ਸਮੇਂ ਇੰਨੀ ਪ੍ਰਬਲ ਹੋ ਰਹੀ ਹੈ ਕਿ ਕਈ ਨਾਮੀ-ਕਨਾਮੀ ਲੋਕ ਇਸ ਵੱਲ ਖਿੱਚੇ ਜਾ ਰਹੇ ਹਨ। ਸਾਡੇ ਸਮਾਜ ਅੰਦਰ ਇਹੀ ਵੱਡੀ ਗਿਰਾਵਟ ਦੀ ਨਿਸ਼ਾਨੀ ਹੈ।ਨਸ਼ਿਆਂ ਦਾ ਵਪਾਰ ਇਸ ਦੇ ਵਪਾਰੀਆਂ ਨੂੰ ਲਾਭ ਪਹੁੰਚਾਉਣ ਤੱਕ ਹੀ ਸੀਮਤ ਨਹੀਂ ਰਹਿੰਦਾ, ਸਗੋਂ ਇਹ ਸਾਰੇ ਸਮਾਜ ਅੰਦਰ ਕੋਹੜ ਫੈਲਾਉਣ ਦਾ ਸਾਧਨ ਵੀ ਬਣਦਾ ਹੈ। ਇਸ ਵਪਾਰ ਦੀ ਸਭ ਤੋਂ ਖਤਰਨਾਕ ਗੱਲ ਇਹ ਹੈ ਕਿ ਇਸ ਨਾਲ ਸਮੁੱਚੇ ਸਮਾਜ ਅੰਦਰ ਨਸ਼ਿਆਂ ਦੀ ਬਿਮਾਰੀ ਫੈਲਦੀ ਹੈ, ਜੋ ਅੱਗੇ ਲੋਕਾਂ ਨੂੰ ਨਰਕ ਭਰੀ ਜ਼ਿੰਦਗੀ ਵੱਲ ਧੱਕਦੀ ਹੈ। ਇਸ ਕਰਕੇ ਬੇਇਮਾਨੀ ਨਾਲ ਪੈਸਾ ਕਮਾਉਣ ਦੇ ਧੰਦੇ ਵਿਚ ਸਭ ਤੋਂ ਘਟੀਆ ਅਤੇ ਖਤਰਨਾਕ ਵਪਾਰ ਇਹੀ ਗਿਣਿਆ ਜਾਂਦਾ ਹੈ। ਜਿਹੜਾ ਵਿਅਕਤੀ ਆਪਣੇ ਨਿੱਜੀ ਲਾਭ ਲਈ ਸਮਾਜ ਨੂੰ ਮੌਤ ਦੇ ਮੂੰਹ ਧੱਕਣ ਦਾ ਯਤਨ ਕਰਦਾ ਹੈ, ਉਸ ਦਾ ਜ਼ੁਰਮ ਨਾ-ਕਾਬੀਲੇ ਮੁਆਫ ਬਣਦਾ ਹੈ। ਨਵੇਂ ਸਾਹਮਣੇ ਆਏ ਨਸ਼ਿਆਂ ਦੇ ਵਪਾਰ ਦੇ ਨੈਟਵਰਕ ਵਿਚ ਦੁਨੀਆ ਭਰ ਵਿਚ ਨਸ਼ੇ ਵੇਚਣ ਲਈ ਖੇਡਾਂ ਅਤੇ ਖਿਡਾਰੀਆਂ ਨੂੰ ਹਥਿਆਰ ਵਜੋਂ ਵਰਤਣ ਦੀ ਗੱਲ ਵੀ ਸਾਹਮਣੇ ਆਈ ਹੈ। ਇਕ-ਦੂਜੇ ਦੇਸ਼ ਵਿਚ ਟੂਰਨਾਮੈਂਟਾਂ ਵਿਚ ਸ਼ਾਮਲ ਹੋਣ ਵਾਲੇ ਖਿਡਾਰੀਆਂ ਨੂੰ ਵਰਤਿਆ ਜਾਂਦਾ ਹੈ। ਪੰਜਾਬ ਇਸ ਸਮੇਂ ਨਸ਼ਿਆਂ ਦੇ ਵਪਾਰ ਦਾ ਵੱਡਾ ਅੱਡਾ ਬਣਦਾ ਜਾ ਰਿਹਾ ਹੈ। ਅਫਗਾਨਿਸਤਾਨ ਅਤੇ ਪਾਕਿਸਤਾਨ ਤੋਂ ਹੀ ਨਹੀਂ, ਸਗੋਂ ਭਾਰਤ ਵਿਚ ਮੱਧ ਪ੍ਰਦੇਸ਼ ਅਤੇ ਰਾਜਸਥਾਨ ਵਰਗੇ ਸੂਬਿਆਂ ਤੋਂ ਵੀ ਨਸ਼ਿਆਂ ਦੀਆਂ ਖੇਪਾਂ ਧੜਾਧੜ ਪੰਜਾਬ ਪੁੱਜਣ ਦੀਆਂ ਖ਼ਬਰਾਂ ਆ ਰਹੀਆਂ ਹਨ। ਭਾਰਤ ਦੀ ਗੁਆਂਢੀ ਮੁਲਕਾਂ ਨਾਲ ਲੱਗਦੀ ਪੂਰੀ ਸਰਹੱਦ ਤੋਂ ਪਿਛਲੇ ਵਰ੍ਹੇ 500 ਕਿਲੋਗ੍ਰਾਮ ਦੇ ਕਰੀਬ ਹੈਰੋਇਨ ਫੜੀ ਗਈ ਸੀ। ਇਸ ਦਾ ਵੱਡਾ ਹਿੱਸਾ 300 ਕਿਲੋਗ੍ਰਾਮ ਤੋਂ ਵੱਧ ਇਕੱਲੇ ਪੰਜਾਬ ਨਾਲ ਲੱਗਦੀ ਛੋਟੀ ਜਿਹੀ ਸਰਹੱਦ ਤੋਂ ਫੜਿਆ ਗਿਆ ਸੀ। ਲਗਭਗ ਇੰਨੀ ਹੀ ਮਾਤਰਾ ਵਿਚ ਇਹ ਨਸ਼ਾ ਪੰਜਾਬ ਦੀਆਂ ਹੋਰ ਵੱਖ-ਵੱਖ ਥਾਂਵਾਂ ਤੋਂ ਪੁਲਿਸ ਅਤੇ ਹੋਰ ਏਜੰਸੀਆਂ ਨੇ ਬਰਾਮਦ ਕੀਤਾ ਸੀ। ਕੁਇੰਟਲਾਂ ਦੇ ਹਿਸਾਬ ਅਜਿਹੇ ਖਤਰਨਾਕ ਨਸ਼ੀਲੇ ਪਦਾਰਥਾਂ ਦਾ ਪੰਜਾਬ ਵਿਚ ਆਉਣਾ ਵੱਡੀ ਖਤਰੇ ਵਾਲੀ ਘੰਟੀ ਵਜਾ ਰਿਹਾ ਹੈ। ਉਕਤ ਅੰਕੜੇ ਤਾਂ ਸਿਰਫ਼ ਫੜੇ ਗਏ ਨਸ਼ੇ ਦੇ ਹਨ। ਇਸ ਤੋਂ ਇਲਾਵਾ ਜਿਹੜੇ ਨਸ਼ੀਲੇ ਪਦਾਰਥ ਅੱਗੇ ਭੇਜ ਦਿੱਤੇ ਗਏ, ਉਨ੍ਹਾਂ ਦੀ ਗਿਣਤੀ ਇਸ ਤੋਂ ਕਿਤੇ ਵਧੇਰੇ ਦੱਸੀ ਜਾ ਰਹੀ ਹੈ। ਆਮ ਅੰਦਾਜ਼ਾ ਹੈ ਕਿ ਪੰਜਾਬ ਅੰਦਰ ਫੜੇ ਗਏ ਨਸ਼ੀਲੇ ਪਦਾਰਥਾਂ ਦੀ ਗਿਣਤੀ ਬੜੀ ਮੁਸ਼ਕਿਲ ਨਾਲ 20-25 ਫੀਸਦੀ ਹੀ ਹੁੰਦੀ ਹੈ। 75 ਫੀਸਦੀ ਦੇ ਕਰੀਬ ਨਸ਼ੀਲੇ ਪਦਾਰਥ ਅੱਗੇ ਚਲੇ ਜਾਂਦੇ ਹਨ। ਵੱਡੀ ਚਿੰਤਾ ਵਾਲੀ ਗੱਲ ਇਹ ਹੈ ਕਿ ਪੰਜਾਬ ਨਸ਼ੀਲੇ ਪਦਾਰਥਾਂ ਦੀ ਸਪਲਾਈ ਦਾ ਅੱਡਾ ਬਣਨ ਕਾਰਨ ਪੰਜਾਬ ਦੇ ਨੌਜਵਾਨ ਵੀ ਅਜਿਹੇ ਨਸ਼ਿਆਂ ਦਾ ਸੇਵਨ ਕਰਨ ਵੱਲ ਵਧਦੇ ਜਾ ਰਹੇ ਹਨ। ਨਵੀਂ ਗੱਲ ਇਹ ਵੀ ਸਾਹਮਣੇ ਆਈ ਹੈ ਕਿ ਹੁਣ ਸਿਰਫ ਅਫੀਮ, ਹੈਰੋਇਨ, ਸਮੈਕ ਵਰਗੇ ਨਸ਼ੇ ਹੀ ਨਹੀਂ ਰਹਿ ਗਏ, ਸਗੋਂ ਕੈਮੀਕਲ ਰਾਹੀਂ ਬਣਾਏ ਜਾਂਦੇ ਸਿੰਥੈਟਿਕ ਨਸ਼ਿਆਂ ਦਾ ਵੀ ਪੰਜਾਬ ਅੰਦਰ ਵੱਡਾ ਭੰਡਾਰ ਹੋ ਰਿਹਾ ਹੈ। ਪਿਛਲੇ 7-8 ਮਹੀਨਿਆਂ ਵਿਚ ਕਈ ਅਜਿਹੇ ਲੋਕ ਫੜੇ ਗਏ ਹਨ, ਜਿਹੜੇ ਕੈਮੀਕਲ ਆਧਾਰਿਤ ਸਿੰਥੈਟਿਕ ਨਸ਼ੀਲੇ ਪਦਾਰਥ ਬਣਾ ਕੇ ਦੁਨੀਆ ਭਰ ਵਿਚ ਸਮੱਗਲ ਕਰਦੇ ਰਹੇ ਹਨ। ਹੁਣੇ ਫੜੇ ਗਏ ਭੋਲਾ ਗਿਰੋਹ ਦੀ ਵੀ ਇਹ ਗੱਲ ਸਾਹਮਣੇ ਆਈ ਹੈ ਕਿ ਉਸ ਨੇ ਸਿੰਥੈਟਿਕ ਨਸ਼ੀਲੇ ਪਦਾਰਥ ਬਣਾਉਣ ਲਈ ਚੀਨੀ ਅਤੇ ਵੀਅਤਨਾਮੀ ਨਾਗਰਿਕ ਵੀ ਇਥੇ ਲਿਆਉਂਦੇ ਹੋਏ ਸਨ। ਸਿੰਥੈਟਿਕ ਨਸ਼ੀਲੇ ਪਦਾਰਥਾਂ ਦੀ ਸਹੀ ਕੁਆਲਿਟੀ ਨੂੰ ਯਕੀਨੀ ਬਣਾਉਣ ਲਈ ਵਿਦੇਸ਼ੀ ਨਸ਼ੇ ਦੇ ਸੌਦਾਗਰਾਂ ਵੱਲੋਂ ਅਜਿਹੇ ਲੋਕਾਂ ਨੂੰ ਇਥੇ ਭੇਜਿਆ ਗਿਆ ਸੀ। ਉਸ ਦੇ ਨੈਟਵਰਕ ਵਿਚ ਬਹੁਤ ਸਾਰੇ ਅਹਿਮ ਪ੍ਰਵਾਸੀ ਪੰਜਾਬੀਆਂ ਦੇ ਸ਼ਾਮਲ ਹੋਣ ਦੇ ਵੀ ਪੁਲਿਸ ਵੱਲੋਂ ਸੰਕੇਤ ਦਿੱਤੇ ਜਾ ਰਹੇ ਹਨ। ਸੋ ਨਸ਼ਿਆਂ ਦੇ ਇਸ ਵੱਧ ਰਹੇ ਵਰਤਾਰੇ ਦਾ ਸਾਡੇ ਸਮਾਜ ਨੂੰ ਗੰਭੀਰ ਨੋਟਿਸ ਲੈਣਾ ਚਾਹੀਦਾ ਹੈ ਅਤੇ ਇਸ ਦੇ ਨੁਕਸਾਨ ਤੋਂ ਸਭਨਾਂ ਨੂੰ ਜਾਗ੍ਰਿਤ ਕਰਨਾ ਚਾਹੀਦਾ ਹੈ। ਜੇਕਰ ਇਸ ਸਮੇਂ ਅਸੀਂ ਸੁਚੇਤ ਹੋ ਕੇ ਇਸ ਵਰਤਾਰੇ ਨੂੰ ਠੱਲ੍ਹ ਨਾ ਪਾਈ ਤਾਂ ਸਾਡੇ ਸਮਾਜ ਲਈ ਬੇਹੱਦ ਨੁਕਸਾਨਦੇਹ ਹੋਵੇਗਾ।