ਜਿਸ ਰਾਹ ਤੇ ਚਲਿਐਂ, ਕੀਹ ਮਕਸਦ?

ਜਿਸ ਰਾਹ ਤੇ ਚਲਿਐਂ, ਕੀਹ ਮਕਸਦ?
ਰਬ ਜਗ ਤੇ ਘਲਿਐਂ, ਕੀਹ ਮਕਸਦ?

ਕਿਉਂ ਮੇਰੀ ਮੇਰੀ ਕਰਦਾ ਹੈਂ?
ਮਿੱਟ-ਮਾਇਆ ਸੰਗ ਘਰ ਭਰਦਾ ਹੈਂ,
ਮਾਇਆ ਤੇ ਫੁਲਿਐਂ? ਸੋਚ ਕਰੀਂ,
ਕਿਉਂ ਮਰਨਾ ਭੁਲਿਐਂ? ਸੋਚ ਕਰੀਂ।
ਹੱਥ ਖਾਲੀ ਸੀ ਜਦ ਆਇਆ ਸੀ,
ਨਾ ਜਾਂਦੇ ਕੁੱਝ ਹੱਥ ਪਾਇਆ ਸੀ ।
ਮੋਹ-ਮਾਇਆ ਛਲਿਐਂ ਕੀਹ ਮਕਸਦ?
ਜਿਸ ਰਾਹ ਤੇ ਚਲਿਐਂ, ਕੀਹ ਮਕਸਦ?

ਇਕ ਸੱਚ ਸਹਿਣ ਦਾ ਜੇਰਾ ਨਈਂ,
ਜੋ ਅਪਣਾ ਆਖੇਂ, ਤੇਰਾ ਨਈਂ,
ਸਭ ਬਦਲਣਹਾਰੀ ਦੁਨੀਆਂ ਹੈ,
ਜੋ ਸਦਾ ਸਥਿਰ, ਨਿਰਗੁਣੀਆ ਹੈ,
ਤੂੰ ਉਸਦੇ ਸੰਗ ਕਿਉਂ ਜੁੜਦਾ ਨਈਂ?
ਮੋਹ-ਮਾਇਆ ਨਾਲੋਂ ਮੁੜਦਾ ਨਈਂ।
ਅੱਗ ਹਿਰਸ ਦੀ ਬਲਿਐਂ, ਕੀ ਮਕਸਦ?
ਜਿਸ ਰਾਹ ਤੇ ਚਲਿਐਂ, ਕੀਹ ਮਕਸਦ?
ਰਬ ਜਗ ਤੇ ਘਲਿਐਂ, ਕੀਹ ਮਕਸਦ?

ਤੇਰਾ ਮਕਸਦ ਉਸ ਨੂੰ ਪਾਉਣਾ ਹੈ,
ਜਾ ਉਸ ਦੇ ਵਿਚ ਸਮਾਉਣਾ ਹੈ,
ਜੇ ਉਸ ਦੇ ਵਿਚ ਮਿਲਾਉਣਾ ਹੈ?
ਤਾਂ ਪੈਣਾ ਆਪ ਮਿਟਾਉਣਾ ਹੈ,
ਜਿਉਂ ਜਲ ਵਿਚ ਜਲ ਮਿਲ ਜਾਂਦਾ ਹੈ,
ਫਿਰ ਆਪਾ ਵੀ ਮਿਟ ਜਾਂਦਾ ਹੈ,
ਨਾ ਉਸ ਵਿਚ ਰਲਿਐਂ, ਕੀਹ ਮਕਸਦ?
ਜਿਸ ਰਾਹ ਤੇ ਚਲਿਐਂ, ਕੀਹ ਮਕਸਦ?

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ